Վստահությունը` անհրաժեշտ պայման ձգձգվող հակամարտությունների կարգավորման համար

Վստահության կառուցումը` որպես հաշտության հիմք, անհրաժեշտ պայման է նաեւ ԵԱՀԿ տարածքում ձգձգվող հակամարտությունների կարգավորման առաջընթացի համար. ասվում է ռուսական «Կոմերսանտ» թերթում տպագրված` ԵԱՀԿ գլխավոր քարտուղար Լամբերտո Ձանիերի հոդվածում:

Այդ համատեքստում անդրադառնալով նաեւ Ղարաբաղյան հակամարտությանը նա նշել է. «Աջակցությունը Ղարաբաղյան հակամարտության կարգավորմանը` միաժամանակ տեղերում լարվածության հետագա աճի կանխմամբ, աշխատանքի եւս մեկ առաջնահերթ ուղղություն է, որում ՌԴ եւ ԵԱՀԿ մյուս կարեւոր անդամների դիրքորոշումները համընկնում են: Ռուսաստանի ակտիվ գործունեությունը ԵԱՀԿ Մինսկի խմբում եւ ՌԴ նախագահի անձնական ներգրավվածությունը Ադրբեջանի եւ Հայաստանի միջեւ բարձր մակարդակով բանակցություններին որոշման որոնման կարեւոր տարրերն են»:

Նշենք, որ ԵԱՀԿ գլխավոր քարտուղարն այցելելու է Մոսկվա եւ հանդիպումներ է ունենալու ՌԴ ԱԳ նախարար Սերգեյ Լավրովի եւ այլ բարձրաստիճան պաշտոնյաների հետ: