ԼՂՀ զինծառայողները ադրբեջանական անօդաչու ինքնաթիռ են ոչնչացրել (թարմացված, լուսանկարներ, տեսանյութ)

Արցախի մեր աղբյուրի տեղեկություններով` ԼՂՀ Պաշտպանության բանակի զինծառայողները կործանել են ադրբեջանական անօդաչու ինքնաթիռ-հետախույզ:

ԼՂՀ պաշտպանության նախարարությունում խոստացել են մի քանի ժամվա ընթացքում մանրամասներ ներկայացնել: Իսկ ադրբեջանական կողմը ո'չ հաստատում, ո'չ էլ հերքում է այդ տեղեկատվությունը:

Ի դեպ, ադրբեջանական անօդաչու ինքնաթիռները (ըստ որոշ տեղեկությունների` դրանք իսրայելական արտադրության են) պարբերաբար թռիչքներ են իրականացնում ԼՂՀ սահմանագծի երկայնքով:

15:25- ԼՂՀ Պաշտպանության բանակի լրատվության եւ քարոզչության բաժինը տեղեկացնում է, որ սեպտեմբերի 12-ին` ժամը 7.30-ի սահմաններում, ՊԲ ՀՕՊ եւ ռադիոէլեկտրոնային պայքարի ստորաբաժանումների կողմից ձեռնարկված հատուկ միջոցառումների արդյունքում Մարտունու շրջանի Վազգենաշեն գյուղի մերձակայքում ոչնչացվել է ադրբեջանական զինուժի մեկ անօդաչու թռչող սարք: Խփված ինքնաթիռի մասերը գտնվում են ՊԲ համապատասխան ծառայությունների տրամադրության տակ: Դեպքի մանրամասները ուսումնասիրելու համար ստեղծվել է հանձնաժողով, կատարվում է քննություն: