Կիպրոսում ձերբակալված լրագրողներին ազատ են արձակել

«Մեդիա-Տրեստ» ընկերության լրագրողներ Դմիտրի Շերբանովն ու Դմիտրի Վլասովը, ովքեր Կիպրոսի ոստիկանության կողմից ձերբակալվել էին չթույլատրված տեսանկարահանումներ անելու համար, ազատ են արձակվել. հաղորդում է «Ինտերֆաքսը»:

Սակայն նրանց գործընկերներն ու բարեկամներն անհայտ պատճառներով չեն կարողանում կապ հաստատել նրանց հետ: «Մեր երկու աշխատակիցների հեռախոսներն էլ աշխատում են, բայց նրանք չեն պատասխանում զանգերին»,-  ասել է «Մեդիա-Տրեստի» մամուլի պատասխանատու Աննա Կուդինովան:

Նա տեղեկացրել է նաեւ, որ ռուսական դեսպանատնից իրենց պաշտոնապես տեղեկացրել են, որ լրագրողներն ազատ են արձակվել: «Նկատի ունենալով այն, թե մեր լրագրողներն ինչ նյութ էին պատրաստում` նրանց դեմ ցանկացած սադրիչ քայլը չի բացառվում»,- հավելել է Կուդինովան:

Ռուս լրագրողներ Շերբանովն ու Վլասովը հետաքննական տեսանյութ են պատրաստելիս եղել Լիմասոլ քաղաքում: Ոստիկանները նրանցից պահանջել են նախ ջնջել նկարահանված նյութերը, այնուհետեւ տեղափոխել ոստիկանական բաժանմունք: