Երեք նախաձեռնություն` "Սիվիլիթաս"-ից

Սեպտեմբերից «Սիվիլիթաս» հիմնադրամը հանդես կգա երեք նոր նախաձեռնություններով: Հիմնադրամը համացանցով լուրեր կհեռարձակի, օրաթերթ կհրատարակի, նաեւ հանրային հարցումներ կանցկացնի:

Ըստ «Սիվիլիթաս»-ի` հայերեն եւ անգլերեն լեզուներով հեռարձակվող «ՍիվիլՆեթ»-ը լուսաբանելու է Հայաստանի ներքին կյանքը, տարածաշրջանային զարգացումները, ինչպես նաեւ միջազգային իրադարձությունները: Օտարերկրյա եւ տեղական փորձագետների մասնակցությամբ լուրերի թողարկումները կարելի է դիտել համացանցով՝ ուղիղ հեռարձակմամբ:

Օրաթերթն անդրադառնալու է Հայաստանի տնտեսական եւ քաղաքական խնդիրներին, օրվա լուրերին, ինչպես նաեւ կարեւոր տեղ է հատկացնելու հանրային կարծիքին ու վերլուծությանը: Թերթում տեղ կգտնեն հայաստանցի եւ օտարերկրյա լրագրողների հրապարակումներ: Ավելի շատ անդրադարձ է լինելու տնտեսությանն ու գործարարությանը, ինչպես նաեւ քաղաքականությանը, չեն անտեսվելու սոցիալական հարցերը, մշակույթն ու սպորտը:

Այս ամենի հետ մեկտեղ հիմնադրամը սկսել է հանրային հարցումների անցկացումը՝ նպատակ հետապնդելով մանրամասն նախագծված հարցադրումների միջոցով վեր հանել ՀՀ քաղաքացիների իրական կարծիքներն ու դիրքորոշումները: