Սպասում են "հին ու բարի ժամանակներին"

Արդեն երկու ամիս է` ՀՀ նախագահի վերահսկողության ծառայության 7 աշխատակիցներ գտնվում են Գուգարքի տարածաշրջանային մաքսատան Բագրատաշենի մաքսակետում: Նրանք աչալրջորեն հետեւում են մաքսակետի աշխատողների գործողություններին եւ ժամանակ առ ժամանակ նրանց հարցեր ուղղում մաքսազերծվող բեռնատարների եւ այլնի մասին:

Ինչպես տեղեկացնում է Tesankyun.am-ը, վերահսկողության ծառայության ուշադրության ներքո մաքսավորները սկսել են արագ սպասարկել մեքենաները, նախկինի նման այս գործում ուշացումներ, մեքենաների հերթեր չեն գոյանում:

Հիշեցնենք, որ նախկինում մաքսային տարբեր հերթափոխներ կիրառում էին հայկական համարանիշներով մեքենաների` Հայաստան ելումուտի տարբեր սակագներ:

«Բագրատաշենի մաքսակետի աշխատողները անհամբերությամբ են սպասում սեպտեմբերին, երբ երկրի ղեկավարի վերահսկողության ծառայության աշխատակիցները կվերադառնան Երեւան: Այդ ժամանակ մաքսավորների համար ամեն ինչ կլինի այնպես, ինչպես «հին, բարի ժամանակներում»,- եզրահանգում է Tesankyun.am-ը: