Կենտրոն-Նորք Մարաշի դատախազը ինքնասպան է եղել

Վանաձորի քաղաքային գերեզմանատանը հայտնաբերվել է Երևանի Կենտրոն և Նորք Մարաշ վարչական շրջանների դատախազության դատախազ Արամ Գրիգորյանի դիակը` քունքային շրջանում հրազենային վնասվածքով:

Ինչպես «Երկիր»-ին հայտնեց ՀՀ գլխավոր դատախազի մամուլի քարտուղար Սոնա Տռուզյանը, նախնական տվյալներով` նա ինքնասպանություն է գործել իրեն ամրակցված հաշվեցուցակային «Մակարով» տեսակի ատրճանակով: Դեպքի վայրում հայտնաբերվել և առգրավվել է հաշվեցուցակային ատրճանակը և մեկ պարկուճ: Գրիգորյանի` գերեզմանատան մոտ կանգնեցված անձնական օգտագործման ավտոմեքենայում հայտնաբերվել է գրություն, որում նշված է եղել, որ իր մահվան մեջ պետք չէ որևէ մեկին մեղադրել:

Սոնա Տռուզյանը նաև տեղեկացրեց, որ հարուցվել է քրեական գործ ՔՕ 110-րդ հոդվածի «Ինքնասպանության հասցնելը» հատկանիշներով: Նախաքննությունն իրականացնում է Հատուկ քննչական ծառայությունը:

Արամ Գրիգորյանը ծնվել էր 1974 թվականին, ամուսնացած էր, ուներ 3 անչափահաս երեխա: