Սիրտը` Հունգարիային

Հունգարիայում հողին է հանձնվել Ավստրիայի վերջին կայսր եւ Հունգարիայի վերջին թագավոր Կարլ Առաջինի որդու եւ ժառանգորդի` Օտտո ֆոն Հաբսբուրգի սիրտը:

Հանգուցյալի կտակի եւ ընտանեկան ավանդույթի համաձայն` ավստրո-հունգարական գահի ժառանգի սիրտն իր վերջին հանգրվանն է գտել Դյեր քաղաքի մոտակայքում գտնվող բենեդիկտյան աբբայությունում:

Հուլիսի 4-ին մահացած Օտտո ֆոն Հաբսբուրգի հանդիսավոր հուղարկավորությունը տեղի է ունեցել Վիեննայում:

Օտտո ֆոն Հաբսբուրգը ծնվել է 1912 թվականին: Երկրորդ համաշխարհային պատերազմից հետո նա եվրոպական ինտեգրման առաջին ջատագովներից էր, 20 տարի շարունակ եղել է Եվրախորհրդարանի պատգամավոր: 1961 թվականին պաշտոնապես հրաժարվել է գահի նկատմամբ հավակնություններից, որից 5 տարի անց նրան թույլատրել են այցելել Ավստրիա, որը նրա ընտանիքը լքել էր 1919 թվականին: