Նոր ձերբակալություններ` թուրքական զինվորականության շրջանում

Ստամբուլի ծանր հանցագործությունների 10-րդ դատարանը Թուրքիայի զինված ուժերի 6 գեներալի, նաեւ մեկ ծովակալի ու գնդապետի ձերբակալության թույլտվություն է տվել: Բարձրաստիճան զինվորականները մեղադրվում են պետական հեղաշրջման «Բալյոզ» ծրագրին մասնակցելու մեջ. տեղեկացնում են թուրքական ԶԼՄ-ները:

Առաջին անգամ «Բալյոզ» ծրագրի մասին հիշատակվել է կառավարամետ «Թարաֆ» թերթում անցյալ տարվա փետրվարին: Ըստ հեղաշրջման ծրագրի` նախատեսվում էր ապակայունացնել վիճակը Թուրքիայի խոշոր քաղաքներում` պայթյուններ կազմակերպելու, Էգեյան ծովում մի քանի թուրքական կործանիչներ ոչնչացնելու (այնուհետեւ մեղքը գցվելու էր Հունաստանի վրա), երկրի ռազմական թանգարանը գրավելու միջոցով:

Ըստ «Թարաֆի»` ծրագրի համահեղինակներից մեկը գեներալ Չեթին Դողանն է, որը չի հերքում, որ նման ծրագիր գոյություն ունի, սակայն հայտարարում է, որ այն մշակվել է «բացառապես ուսումնական նպատակներով` ռազմական խաղերի անցկացման համար»: