Պահուստային քայլերի մասին ՀԱԿ-ը կխոսի վաղվա հանրահավաքում

Հայ ազգային կոնգրեսը հանրահավաքին նախապատրաստվելու շրջանն ավարտական փուլում է. այսօր հրավիրված մամուլի ասուլիսում հայտարարեց ՀԱԿ արտաքին հարաբերությունների հանձնաժողովի անդամ Վլադիմիր Կարապետյանը:

Նա նշեց, որ երկխոսության վերաբերյալ իրենց պատկերացումներն ու ընթացող գործընթացների վերաբերյալ գնահատականները ՀԱԿ լիդերները կներկայացնեն վաղը` հերթական հանրահավաքում: «Գայթակղությունը շատ մեծ է` խոսել պահուստային քայլերի մասին, բայց սպասենք հանրահավաքին, որի ժամանակ կնշվեն մեր մոտեցումներն ու դիրքորոշումները, թե ինչպես ենք երկխոսության հարցում առաջ շարժվելու իշխանությունների հետ: Բոլոր հարցերի պատասխանները կտրվեն վաղը»,- նշեց Կարապետյանը:

Նրա խոսքով` քաղաքական ճգնաժամը, որ առկա է Հայաստանում 2008թ. նախագահական ընտրություններից հետո, դեռեւս հաղթահարված չէ, եւ ստեղծված իրավիճակը փոխելու միակ ճանապարհը կոնգրեսի համար շարունակում է մնալ մեկը` արտահերթ նախագահական եւ խորհրդարանական ընտրությունների անցկացումը: