Ագրեսիայի ցանկացած փորձ կավարտվի մեծ կորուստներով

«Ադրբեջանի կողմից անընդհատ հնչող ռազմատենչ հայտարարությունները վերջին օրերին փոխակերպվել են պատերազմի բացահայտ կոչերի: Այժմ, երբ միջազգային հանրությունը մեծ ակնկալիքներ ունի Կազանում կայանալիք Հայաստանի և Ադրբեջանի նախագահների հանդիպումից, Ադրբեջանի պաշտպանության նախարարության խոսնակը սպառնալից հայտարարում է, որ Ադրբեջանը պատրաստվում է պատերազմի»,- մեկնաբանելով Ադրբեջանի պաշտպանության նախարարության մամուլի խոսնակ Էլդար Սաբիրօղլուի հայտարարությունները՝ Panorama.am-ին ասել է ՀՀ պաշտպանության նախարարի մամուլի խոսնակ Դավիթ Կարապետյանը:

ՀՀ պաշտպանության նախարարության մամուլի խոսնակը շեշտել է, որ Արցախի խաղաղասեր ժողովրդի նկատմամբ ագրեսիայի ցանկացած փորձ ավարտվելու է հակառակորդի ահռելի կորուստներով: 

«Հարևան երկրի ռազմական գերատեսչությանը հարկ է հիշեցնել, որ արկածախնդրությունը ճակատագրական է լինելու Ադրբեջանի համար»,- ասել է Դավիթ Կարապետյանը:

Հիշեցնենք, որ  որ Սաբիրօղլուն, մասնավորապես, ասել է, թե հայկական կողմի գործողություններն անխուսափելի են դարձնում ԼՂ հիմնախնդրի ռազմական ճանապարհով լուծումը՝ ընդգծելով, որ Ադրբեջանն այդ ուղղությամբ նախապատրաստական աշխատանքներ է տանում: