Երկաթի տենդ

Մայիսի 30-ի լույս 31-ի գիշերը գողացել են Մարտունի քաղաքի Գետափնյա փողոցի կոյուղագծի դիտահորերի չուգունե կափարիչները:

Կոյուղագիծն անցյալ տարի էր վերանորոգվել Վերակառուցման և զարգացման եվրոպական բանկի աջակցությամբ իրականացվող` Հայաստանում մաքրման կայանների կառուցման ծրագրով (ուղղված նաև Սևանա լճի մաքրության պահպանմանը):

Ընդհանուր առմամբ, 27 կափարիչ է գողացվել, գողերը ձեռք չեն տվել միայն «Զանգակ» հեռուստաընկերության դիմաց գտնվող դիտահորին, հավանորեն տեսախցիկներից են վախեցել: Վրդովված բնակիչները ստիպված են եղել հորերը փակել ձեռքի տակ եղած թիթեղներով ու փայտով:

Ի դեպ, մի քանի օր առաջ նույն փողոցում գողացել էին նաեւ Մարտունի գետի` Գետափնյա փողոցը հիվանդանոց տանող ճանապարհին կապող կամրջակի երկաթյա եզրաճաղերը: Քաղաքապետարանը դիմել էր ոստիկանություն, սակայն հանցագործությունը դեռ բացահայտված չէ: