46 մլն եվրո` Վրաստանին

Եվրախորհրդարանի պատգամավորներն այսօր միաձայն հավանություն են տվել Վրաստանին 46 մլն եվրոյի ֆինանսական օգնություն տրամադրելու փաթեթին:

Օգնությունը նախատեսված է հանրապետության տնտեսական աճը խթանելու, գործազրկությունը նվազեցնելու, նաեւ արտահանումն ավելացնելու համար: Բացի այդ, եվրախորհրդարանականները հույս ունեն, որ այդ միջոցառումները հնարավորություն կտան բարեփոխելու Վրաստանի տնտեսության ֆինանսական ոլորտը եւ երկիրը գրավիչ կդարձնեն ներդրողների համար:

Գումարի կեսը տրամադրվելու է դրամաշնորհների, մյուս մասը` վարկերի տեսքով:

Եվրախորհրդարանը Վրաստանի իշխանություններին նաեւ կոչ է արել անշեղորեն կատարել Արժույթի միջազգային հիմնադրամի առջեւ ստանձնած պարտավորությունները: