Վրե՞ժ են լուծում

Լոռու մարզի ընդհանուր իրավասության դատարանում լսվել է Վանաձորի «ՍԶՆԻ» ՍՊԸ-ի տնօրենի հայցն ընդդեմ Վանաձորի Լևոն Արեշյանի անվան թիվ 1 հիվանդանոցային համալիրի:

ՍՊԸ-ի տնօրեն Գառնիկ Սահակյանը պահանջում է հիվանդանոցից կատարել գնումների մասին օրենքով սահմանված պարտավորությունները: Նախորդ տարվա նոյեմբերին «ՍԶՆԻ»-ն հաղթող էր ճանաչվել հիվանդանոցի հայտարարած մրցույթում` 11 անուն դեղերի մասով, սակայն շուտով տեղեկացել է, որ ամենամեծ չափաբաժնով դեղամիջոցը համալիրը նվեր է ստացել «Նատալի ֆարմ» ընկերությունից:

Հիվանդանոցի տնօրենը հրաժարվում է կատարել պայմանագրով նախատեսված կետերը` պատճառաբանելով, որ նշված դեղի համար գնման անհրաժեշտությունը վերացել է:

Գառնիկ Սահակյանը գրեթե համոզված է, որ իր նկատմամբ վերաբերմունքը քաղաքական ենթատեքստ ունի. նա «Ժառանգություն» կուսակցության Լոռու մարզային կառույցի ղեկավարն է:

Ապրիլ 27-ին դատարանը որոշում կկայացնի: