Մեդվեդեւն առանց ինքնաթիռի է մնացել

ՌԴ նախագահ Դմիտրի Մեդվեդեւը Անվտանգության խորհրդի նիստի ժամանակ բողոքել է իրեն սպասարկող ինքնաթիռի անսարքությունից: Ինչպես գրում է Gazeta.ru-ն, նախագահը հստակեցրել է, որ խոսքը Տու-214-ի մասին է.

«Ինքնաթիռն այս պահին ենթակա չէ շահագործման: Այն բառացիորեն նորից հավաքում են գործարանում, որպեսզի հասկանան, թե որն է խնդիրը»,- ասել է նախագահը:

Մեդվեդեւն այդ ինքնաթիռով ընդամենը մի քանի անգամ է երթեւեկել, սակայն թռիչքներից մեկի ժամանակ խնդիր է առաջացել` վայրէջքի հետ կապված:

Նախագահը նաեւ նշել է, որ ռուսական նոր ինքնաթիռներն էլ լուրջ թերություններ ունեն, դրանք շատ աղմկոտ են, իսկ էլեկտրոնային սարքավորումները զիջում են արեւմտյան համարժեք սարքավորումներին:

«Պետք է իսկապես աշխատել, այլ ոչ թե միայն փող պահանջել»,- ասել է Մեդվեդեւը: