Հարկայինի աշխատակիցներն ազատվել են աշխատանքից

Ինչպես նշվում է ԼՂՀ գլխավոր դատախազության կայքում, դատախազության հատուկ քննչական բաժնում ստուգվել է Շահումյանի շրջանի Խարխափուտ գյուղի բնակիչ Մանուկ Գյոզալյանի կողմից Քարվաճառի ռազմական ոստիկանության բաժանմունք տրված բանավոր հաղորդումը` անցյալ տարվա դեկտեմբերի 30-ին Խարխափուտ գյուղի հսկիչ կետում ԼՂՀ կառավարությանն առընթեր Հարկային պետական ծառայության աշխատակիցներ Ռոլանդ Այդինյանի եւ Ռուսլան Հակոբյանի կողմից իր հասցեին հայհոյանքներ տալու եւ ծեծի ենթարկելու մասին: Ստուգման արդյունքներով` 2011 թ. փետրվարի 18-ի  որոշմամբ մերժվել է քրեական գործի հարուցումը:

Միեւնույն ժամանակ, խախտումները վերացնելու եւ դրանք հետագայում բացառելու նպատակով ԼՂՀ գլխավոր դատախազության հատուկ քննչական բաժինը համապատասխան միջնորդագիր է ներկայացրել ԼՂՀ ԿԱ ՀՊԾ ղեկավարությանը:

Վերոհիշյալ երկու աշխատակիցներն ազատվել են աշխատանքից: