Ֆրանսահայ բարերարը մեղադրվում է կավատության մեջ

«Նուվել դ’Աղմենի» պարբերականի աղբյուրները տեղեկացրել են, որ Արտերկրի հայերի միության (Հայաստանի մասնաճյուղ)  եւ Իրավաբանական մասնագիտությունների հայ-ֆրանսիական ֆեդերացիայի համանախագահ Ռայմոնդ Եզեգելյանի նկատմամբ քրեական գործ է հարուցվել. գրում է «Հետքը»: Նա մեղադրվում է կավատության կամ «բազմաթիվ զոհերի պոռնկության դրդելու մեջ»:

Անցյալ տարվա հունիսի 24-ին Եզեգելյանը, դատավոր Պոլ Հյուբերի որոշմամբ, 3 օրով ձերբակալվել էր:

Ֆրանսիական օրենսդրությամբ`  քանի դեռ կասկածյալը չի դատապարտվել, նա օգտվում է անմեղության կանխավարկածի իրավունքից:

Հայկական մամուլում Ռայմոնդ Եզեգելյանը հիշատակված է` որպես բարերար, Ֆրանսիայում «Ոսկե ծիրան» միջազգային կինոփառատոնի ներկայացուցիչ: ՀՀ սփյուռքի նախարարությունը նրան շնորհակալագիր է հանձնել` «Մեկ ազգ, մեկ մշակույթ» համահայկական IV փառատոնի շրջանակներում: Ռայմոնդ Եզեգելյանը 2007-ից ՀՀ փաստաբանների պալատի պատվավոր անդամ է: