Բանակցությունները ձախողվել են

Փետրվարի 9-ին ԿԺԴՀ եւ Հարավային Կորեայի ներկայացուցիչների միջեւ ընթացող բանակցություններն ավարտվել են անարդյունք, տեղեկացնում են ռուսաստանյան գործակալություններ` վկայակոչելով կորեականները:

Պատճառը տարաձայնություններն են հետագա` ավելի բարձր մակարդակի բանակցությունների օրակարգի շուրջ:

Հարավային Կորեան պնդում է, որ ԿԺԴՀ-ն ընդունի իր մեղքը եւ ներողություն խնդրի հարավկորեական «Չխոնան» հետախուզական ռազմանավը ջրասույզ անելու եւ Ենպխենդո կղզին գնդակոծելու համար: Բացի դրանից` Սեուլը պահանջում է պատժել սույն գործողությունների պատասխանատուներին:

ԿԺԴՀ-ն նշյալ կղզու հրետակոծումը համարում է իր պատասխանը հարավցիների գործողություններին, որոնք այդ շրջանում զորավարժություններ էին անցկացնում, ինչի հետեւանքով արկերն ընկել են ջուրը, որը Հյուսիսային Կորեան իրենն է համարում: Փհենյանը նաեւ պնդում է, որ կապ չունի ռազմանավի կործանման հետ: