Բողոք չկա` խոշտանգումներ չկան

ԼՂՀ մարդու իրավունքների պաշտպան Յուրի Հայրապետյանի հավաստմամբ`  Արցախի քրեակատարողական հիմնարկներում եւ քաղաքացիների հարկադիր պահման վայրերում խոշտանգումների դեպքեր չեն եղել, քանի որ  2010-ին նշված հիմնարկներ այցելելիս ՄԻՊ գրասենյակի աշխատակիցները բողոքներ չեն ստացել:

Գրասենյակի աշխատողներն  այցելել են նաեւ Ստեփանակերտի գիշերօթիկ դպրոց. այստեղ նույնպես իրավունքների խախտումների դեպքեր չեն արձանագրվել, սակայն փաստաթղթերի պատշաճ վիճակում չեն պահվել: Խոսքը գիշերօթիկ դպրոցի երկկողմանի ծնողազուրկ սաներից մեկի անունով բանկային հաշիվ չբացելու մասին է,  ինչի հետեւանքով նրան հասանելիք նպաստը չի փոխանցվել: Այդ հարցը, պաշտպանի վստահեցմամբ, արդեն լուծված է:

Հանրապետության հոգեթմրաբանական դիսպանսերում կատարված ուսումնասիրությունները ցույց են տվել, որ բնագավառը կարգավորող օրենքի բացակայությունը կարող է որոշ խախտումների պատճառ դառնալ: Նման օրենքի մշակման հարցով օմբուդսմենը դիմել է առողջապահության նախարարին: