Գյումրեցի երեխաներին արգելել են նվեր վերցնել

Լուր է տարածվել, թե երեկ Գյումրու քաղաքապետ Վարդան Ղուկասյանը Գյումրու թիվ 12, 23 եւ 24 մանկապարտեզների վարիչներին արգելել է երեխաների համար ուղարկված տոնական նվերներն ընդունել: 

Պատճառն այն է, որ նվեր բաժանողները եղել են ոչ հանրապետականներ: Իսկ Ղուկասյանն էլ զլացել է առանց նվերի մնացած երեխաներին սեփական նախաձեռնությամբ նվերներ ուղարկել: Այս մասին գրում է «ԵրեւակԼուր»-ը:

Այս տեղեկությունը ճշտելու նպատակով զանգահարեցինք Վարդան Ղուկասյանին: Վերջինս անմիջապես վրդովվեց` «սուտ եք ասում, նման բան չկա` քաղաքապետարանը բոլոր նախակրթարաններին էլ նվերներ է ուղարկել»:

Իսկ հարցին, թե իր կարծիքով որտեղի՞ց պիտի նման լուր տարածվեր, պատասխանեց. «Մեր քաղաքում նման բան չի տարածվել: Հենց ձեր թերթն է տարածողը»,- ասաց ու անջատեց կապը: