Տեր Գարեգինին թույլ չեն տվել մասնակցել Սուրբ ծննդյան պատարագին

Մուղնու հովվության հոգևոր հովիվ, Արագածոտնի թեմի դիվանապետ տեր Գարեգին Արսենյանը հնարավորություն չի ունեցել մասնակցելու Սուրբ ծննդյան պատարագին։ Sputnik Արմենիայի հետ զրույցում այս մասին ասել է Մուղնու Սուրբ Գևորգ եկեղեցու հոգևոր հովիվ տեր Եղիշե քահանա Բարսեղյանը։ Նրա խոսքով՝ տեր Գարեգինի հետ խոսելու հնարավորություն չեն ունեցել, այս օրերին տեր Գարեգինի հոր հետ են խոսել, որն էլ ասել է, թե դիմել են խնդրանքով, որ այս օրերին բացառություն արվի, սպասում են։

«Սակայն որևէ փոփոխություն չեղավ։ Տեր Գարեգինին թույլ չտվեցին մասնակցելու պատարագներին»,- ասաց տեր Եղիշեն։

Նա նշեց, որ տեր Գարեգինին անհամբեր սպասում էին ոչ միայն թեմի հոգևոր եղբայրները, այլև հավատացյալ ժողովուրդը։

Փաստաբան Պետրոս Պետրոսյանն էլ Sputnik Արմենիայի հետ զրույցում հայտնել է, որ տեր Գարեգին Արսենյանի գործով այս պահին որևէ փոփոխություն չկա, դեկտեմբերին երկու ամսով երկարացվել է նրա տնային կալանքի ժամկետը։ Նշենք, որ նույն ժամանակահատվածում, կրկին 2 ամսով, երկարաձգվել էր նաև թեմի առաջնորդ Մկրտիչ եպիսկոպոս Պռոշյանի կալանքի ժամկետը։