Մտահոգությունները խորանում են. ընդդիմադիր պատգամավորները ԱԳՆ-ում ծանոթացել են Բաքվի առաջարկներին

ԱԺ «Հայաստան» խմբակցության պատգամավորներ Գեղամ Մանուկյանը, Աննա Գրիգորյանը, Քրիստինե Վարդանյանը եւ Արթուր Խաչատրյանը համատեղ հայտարարություն են տարածել, որում ասվում է.

«Հայաստանի արտաքին գործերի նախարարությունում ծանոթացանք Հայաստանի եւ Ադրբեջանի միջեւ բանակցություններում շրջանառության մեջ դրված փաստաթղթի նախագծի շուրջ վերջերս Երեւանին հղված ադրբեջանական առաջարկներին։

Չմանրամասնելով փաստաթղթի առանձին դրույթները՝ արձանագրում ենք, որ ադրբեջանական առաջարկներն ու մոտեցումները որեւէ կերպ չեն արտահայտում իրական, արդար և հարատև խաղաղություն հաստատելու ցանկություն ունեցող երկրի դիրքորոշումը։

Վերահաստատում ենք, որ շարունակում են ուժի մեջ մնալ նախկինում մեր կողմից բարձրաձայնված բոլոր մտահոգություններն ու անհանգստությունները, որոնք որեւէ կերպ ոչ միայն չեն փարատվում, այլեւ առավել խորանում են»: