Երևանի կենտրոնը դարձնում են միայն հարուստներին հասանելի վայր. պատգամավոր

«Քաղաքացին, ով ստանում է միջինում 150 հազար դրամ  աշխատավարձ, ինչպե՞ս պետք է օգտվի կարմիր գծերով պարփակված կայանատեղիներից», – Yerkir.am -ի հետ զրույցում ասաց ԱԺ  «Հայաստան» խմբակցության պատգամավոր Գառնիկ Դանիելյանը` անրադառնալով կայանատեղիների 13 անգամ թանկանալու խնդրին։

Հիշեցնենք, որ Երևանում տևական վճարների 2024 թ. դրույքաչափեր սահմանելու մասին որոշման համաձայն` փոքր կենտրոնում կայանման վճարը հունվարի 1֊ից դարձավ տարեկան 160 հազար դրամ: Երևանի ավագանու համապատասխան որոշումը պաշտոնապես ուժի մեջ մտավ դեկտեմբերի 26 -ին 32  կող 3 դեմ ձայնով։

Ինչպես բացատրում է Երևանի քաղաքապետարանը` նախաձեռնության հիմքում մայրաքաղաքի փոքր կենտրոնը բեռնաթափելն է, այլ ոչ համայնքային բյուջեի եկամուտներն այս կերպ լցնելը:

Դեմ արտահայտվելով որոշմանը` պատգամավոր Գառնիկ Դանիելյանը նշեց. «Այդ որոշման ընդունումից հետո խնդրահարույց է լինելու նաև տրանսպորտի հարցը, որը ևս լուծված չի։ Հարցին գլոբալ, ծրագրային լուծում չեն տալիս, ընդամենը կիսալուծումներ են տալիս, որն իրավիճակը է'լ ավելի է սրելու: Խնդիրն այլ տեղ է. եթե չեն բավականացնում ավտոկայանատեղիները, ապա պետք է ստորգետնյա կայանատեղիներ ստեղծել, այլ ոչ դրանք թանկացնելով` Երևանի կենտրոնը դարձնել միայն հարուստներին հասանելի վայր»։

Հիշեցնենք` ըստ որոշման Երևան քաղաքը բաժանվել է երկու գոտիների Ա և Բ։

Ա գոտի

Մեկ ժամի համար 300 դրամ

Մեկ օրը` 2000 դրամ

Մեկ շաբաթը` 5000 դրամ

Մեկ ամիսը` 18000 դրամ

Մեկ տարին` 160000 դրամ։

Բ գոտի

Մեկ ժամը` 200 դրամ

Մեկ օրը` 1000 դրամ

Մեկ շաբաթը` 2000 դրամ

Մեկ ամիսը` 4000 դրամ

Մեկ տարին` 24000 դրամ։

Մանե Տիգրանյան

ՀՊՄՀ կուլտուրայի ֆակուլտետ,

լրագրության բաժին,

3-րդ կուրս