Իշխանությունն ընտրությունների՞ է պատրաստվում. հեռախոսային հարցում. Hraparak.am

«Հրապարակի» ակտիվ ընթերցողներից մեկը կապվեց մեզ հետ եւ ասաց, որ քիչ առաջ իրեն զանգահարել են անծանոթ համարից ու հեռախոսային հարցում արել` իրեն մի շարք հարցեր ուղղելով:

Մասնավորապես, հարց են տվել, թե ո՞ւմ եք համարում Ղարաբաղի հարցում մեղավոր եւ առաջարկել են կոնկրետ տարբերակներից ընտրել մեկը` տարբերակները եղել են. ՀՀ կառավարությունը, բանակը, ԱՄՆ-ն, ՌԴ-ն:

Հարցրել են, թե ինչպե՞ս եք վերաբերվում տարբեր անվտանգային կառույցներին եւ պետություններին եւ թվարկել են. ԱՄՆ, ՌԴ, Չինաստան, Իրան, կառույցներից` ՀԱՊԿ, ԵՄ, ՆԱՏՕ, Հաագայի դատարան:

Հաջորդ հարցը վերաբերել է, թե` ինչքանով եք վստահում ՀՀ տարբեր ինստիտուտներին. ՀՀ կառավարությանը, ԱԺ-ին, դատական համակարգին:

Հարց է եղել` վստահո՞ւմ եք արդյոք ՌԴ նախագահ Պուտինին:

Հարց են տվել նաեւ, թե ինչպես եք վերաբերվում հետեւյալ գործիչներին. Նիկոլ Փաշինյան, Ռոբերտ Քոչարյան, Իշխան Սաղաթելյան, Ալեն Սիմոնյան:

Մեր ընթերցողը շատ զարմացած էր հարցադրումներից եւ հատուկ շեշտում էր, որ «գեղական հարցում էր` սոցիոլոգիայի հետ կապ չունեցող»:

Եւ վերջապես` մի հարց էլ են տվել, որն, ըստ մեր զրուցակցի, հարցման բուն նպատակն է հուշում. «Եթե առաջիկա օրերին ընտրություններ լինեն` ո՞ր կուսակցությանը կընտրեք»: Ընդ որում` այս հարցի դեպքում տարբերակներ չեն հուշել` առաջարկել են իր նախընտրած կուսակցության անունն ասի, առանց հուշելու:

Աղբյուրը՝ Hraparak.am

Արեգ Մարգարյան