Փաշինյան-Ալիև հանդիպման նախաձեռնողը Վլադիմիր Պուտինն է. Կրեմլ

Ռուսաստանի նախագահ Վլադիմիր Պուտինի,  Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի եռակողմ բանակցությունները, որոնք համընկնում են 2020 թվականի նոյեմբերի 9-ին Ղարաբաղյան հակամարտության գոտում հրադադարի և բոլոր ռազմական գործողությունների մասին Եռակողմ հայտարարության ստորագրման տարելիցի հետ, տեղի կունենա այսօր Սոչիում։ Կրեմլի մամուլի ծառայությունից հայտնում են, որ հանդիպումը նախաձեռնել է Ռուսաստանի ղեկավարը։

Կրեմլը հայտնել է, որ նախատեսվում է դիտարկել երեք երկրների ղեկավարների՝ 2020 թվականի նոյեմբերի 9-ի և 2021 թվականի հունվարի 11-ի պայմանավորվածությունների կատարման ընթացքը, ինչպես նաև նախանշել տարածաշրջանում կայունության ամրապնդման և խաղաղ կյանքի հաստատման հետագա քայլերը։ Միաժամանակ, հատուկ ուշադրություն է դարձվելու առևտրատնտեսական և տրանսպորտային կապերի վերականգնման և զարգացման հարցերին։

ՌԴ նախագահի մամուլի ծառայությունը հավելել է, որ նախատեսվում են Վլադիմիր Պուտինի առանձնազրույցներ Իլհամ Ալիևի ու Նիկոլ Փաշինյանի հետ։