Իրանում մեկնարկել են օդուժի լայնամասշտաբ զորավարժությունները

Իրանում մեկնարկել են երկրի ռազմաօդային ուժերի  «Երկնքի պաշտպաններ-10» զորավարժությունները։ Զորավարժություններում ներգրավված են ռազմաօդային ուժերի բոլոր բազաները, մարտական ինքնաթիռները և անօդաչու թռչող սարքերը. հայտնել է IRNA գործակալությունը։

Զորավարժությունների առաջին փուլը ներառում է տարբեր բարձրություններով և տարբեր արագություններով թռչող թիրախների ջախջախում։

Իրանի ռազմաօդային ուժերի հրամանատար, բրիգադի գեներալ Համիդ Վահեդին նախօրեին ասել է, որ զորավարժությունների նպատակն է «ցուցադրել Իրանի ռազմաօդային ուժերի կարողությունները, թշնամու թիրախներին հարվածելու պատրաստակամությունը»: Զորավարժություններում, նրա խոսքով, կներգրավվեն «ներքին արտադրության բոլոր տեսակի համակարգերը և զինատեսակները, ներառյալ` ծանր և միջին ճշգրտության ռումբերը, ղեկավարվող բոլոր տեսակի հրթիռները»:

Առաջին անգամ կիրառվել է իրանական արտադրության «Կոդս» ռադարը, որն ունակ է թիրախներ հայտնաբերել 500 կմ հեռավորությունից և ավելի քան 30 հազար մետր բարձրությունից: