Արցախում ականի վրա երեք ադրբեջանցի է պայթել

Ադրբեջանի երեք քաղաքացիական անձինք պայթել են Բաքվի կողմից վերահսկվող Լեռնային Ղարաբաղի տարածքում տեղադրված ականի վրա՝ փորձելով շրջանցել իրենց սեփական զինված ուժերի անցակետերը: Այս մասին հաղորդագրություն է տարածել Ադրբեջանի ՆԳՆ-ն:

Նշվում է, որ միջադեպի արդյունքում մեկ քաղաքացիական անձ մահացել է տեղում, երկուսը բազմաթիվ վնասվածքներով տեղափոխվել են հիվանդանոց: Այս կապակցությամբ Աղդամի շրջանի դատախազությունը քրեական գործ է հարուցել անձանց անհայտ շրջանակի դեմ ագրեսիվ պատերազմի, կանխամտածված սպանության և մի քանի այլ հոդվածներով:

«Մենք մեր քաղաքացիներին կոչ ենք անում եզրակացություններ անել նման դեպքերից, չայցելել ազատագրված (օկուպացված՝ խմբ.) տարածքներ՝ վտանգելով իրենց կյանքն ու առողջությունը»,- ասվում է հաղորդագրության մեջ: