Էկոլոգիական աղետ՝ Իսրայելում. մազութն աղտոտել է Միջերկրական ծովի ափերը

Տասնյակ տոննա մազութ է թափվել Իսրայելի՝ Միջերկրական ծովի ափերի մեծ մասում: Տեղական իշխանությունները խոսում են երկրի պատմության մեջ ամենամեծ բնապահպանական աղետի մասին․ հայտնում է BBC-ի ռուսական ծառայությունը:

Նշվում է, որ հազարավոր կամավորներ և զինվորներ օգնում են մաքրել ափը մազութի կույտերից, որն արդեն լուրջ վնաս է հասցրել բնությանը: Տուժած տարածքներում հայտնաբերվել են սատկած կրիաներ, ձկներ և թռչուններ, որոնց մնացորդները ներկված են սև գույնով:

Իսրայելի իշխանությունները փորձում են պարզել աղտոտման պատճառը. նախնական տվյալների համաձայն՝ պատճառը նավից վառելիքի արտահոսքն է:

Իսրայելի՝ 190 կիլոմետրանոց ափամերձ գծի մեծ մասում հայտնաբերվել են մազութի կույտեր: Տեղական իշխանությունները վախենում են, որ տուժած տարածքի մաքրումը կարող է տևել ամիսներ կամ նույնիսկ տարիներ: Բնակիչներին խնդրում են զերծ մնալ միջերկրածովյան լողափեր այցելելուց:

Որպեսզի պարզեն, թե որ նավից կարող էր տեղի ունենալ արտահոսքը, մասնագետներն ուսումնասիրում են արբանյակային պատկերները և ալիքների ուղղությունը:

Բնապահպանության նախարար Գիլա Գամլիելը հայտնել է, որ այս պահին տարածքում գտնվող ինը նավ է կասկածվում: Իսրայելի իշխանությունները քննարկում են փոխհատուցման համար դատական հայց հարուցելու հնարավորությունը, ինչը մեղավորներին կարող է արժենալ միլիոնավոր դոլարներ:

Իսրայելի վարչապետ Բինյամին Նեթանյահուն անձամբ է այցելել լողափերից մեկը՝ գնահատելով վնասը: