ՀՀ տարածքից Ադրբեջանի տարածքի հրթիռակոծություն կամ հրետակոծություն չի իրականացվել. Դավիթ Տոնոյան

ՀՀ պաշտպանության նախարար Դավիթ Տոնոյանը, պատասխանելով «Զինուժ մեդիայի» հարցերին, ասել է, որ կեղծիք են Ադրբեջանի ռազմաքաղաքական ղեկավարության պնդումները, թե Հայաստանի հանրապետության տարածքից Ադրբեջանի բնակավայրերի հրթիռակոծություն է իրականացվել։

Ի պատասխան հարցի, թե Ադրբեջանի պաշտպանության նախարարը հայտարարել է, որ Հայաստանի գործողությունների պատճառով ընդլայնվելու է մարտական գործողությունների գոտին, ինչ է դա նշանակում, Դավիթ Տոնոյանն ասել է․

«Ես կարծում եմ, որ Ադրբեջանի պաշտպանության նախարարը իր խորը զինվորական գիտելիքներով, երևի թե, խառնել է մարտական գործողությունների ընդլայնման գոտին, որը ներառում է Հայաստանի Հանրապետությունը, մասնավորապես Վարդենիսի շրջանի բնակավայերը հրետակոծվել են՝ օգտագործելով ծանր հրետանին և անօդաչու թռչող սարքերը։ Եվ եթե դա իր համար մարտական գոտու ընդլայնում չէ, թող արդեն մասնագետները դրա եզրակացություններն անեն»,– ասել է նա։

Հարցին, թե Ադրբեջանի պաշտպանության նախարարը նաև մեղադրանք է հնչեցրել, թե Հայաստանի տարածքից հրթիռակոծվել է Ադրբեջանի բնակավայրեր, Դավիթ Տոնոյանը պատասխանել է․

«Հայաստանի Հանրապետության տարածքից Ադրբեջանի տարածք որևիցե հեռահար հրետակոծություն կամ հրթիռների օգտագործում չի իրականացվել դեռևս, և եթե Ադրբեջանի զինված ուժերի կամ ռազմաքաղաքական ղեկավարության համար Ստեփանակերտը, Մարտունին, Հադրութը, Մարտակերը և այլ բնակավայրերը թույլատրելի մարտական գործողության անցկացման վայր են, մեր Պաշտպանության բանակի, Արցախի զինված ուժերի արհեստավարժ, հմուտ ստորաբաժանումները շատ կտրուկ պատասխանում են և Ադրբեջանի համար սարսափելի հետևանքներ են լինելու»,– ասել է նա։