ՀՅԴ ՀԳՄ-ն ցավակցում է Անդրանիկ Հովհաննիսյանի մահվան կապակցությամբ

ՀՅԴ Հայաստանի Գերագույն մարմինը խորը ցավով տեղեկացնում է գաղափարական ընկեր, «Ակունք» ազգագրական համույթի մեներգիչ Անդրանիկ Հովհաննիսյանի մահվան մասին և ցավակցում հանգուցյալի ընտանիքին, հարազատներին, համույթի ողջ կոլեկտիվին ու գաղափարակից ընկերներին։

Հայ երգի մեծ երախտավորներ, երգիչ-բանահավաք Հայրիկ Մուրադյանի և նրա դուստր, ազգագրագետ-բանահավաք Մարո Մուրադյանի ջանքերով շուրջ չորս տասնամյակ առաջ ստեղծված «Ակունք» ազգագրական համույթի կազմում Անդրանիկ Հովհաննիսյանն իր անզուգական ձայնով զարդարել է բազմաթիվ համերգներ, հայրենիքում և աշխարհի բազմաթիվ երկրներում ներկայացրել պատմական Հայաստանի ազգագրական շրջանների հայտնի և անհայտ մի շարք երգեր։ Նրա երգը, հիրավի, բխում էր մեր ակունքներից, պատմությունից ու էությունից։

Սիրելի ընկեր Անդրանիկ Հովհաննիսյանի հոգեհանգստյան արարողությունը տեղի կունենա երկուշաբթի՝ ապրիլի 27-ին, ժամը 17։30-ից, Երևանի «Անգել» սգո սրահում (Արաբկիր վարչական շրջան, Թբիլիսյան խճուղի, 29/10 շենք)։

ՀՅԴ Հայաստանի Գերագույն մարմին

26.04.2020 թ.