Պարետատունը անհամաչափ է կիրառում Արտակարգ դրության իրավական ռեժիմով իրեն վերապահված հայեցողությունը. Ռուբեն Մելիքյան

Իրավապաշտպան, «Իրավական ուղի» կազմակերպության համահիմնադիր Ռուբեն Մելիքյանը Ֆեյսբուքյան իր էջում գրել է.

«Վերջին օրերին անընդհատ հրապարակվում են լրատվամիջոցների, լրագրողների ու սոցցանցերի օգտատերերի բողոքներն առ այն, որ Պարետատունը անհամաչափ է կիրառում Արտակարգ դրության իրավական ռեժիմով իրեն վերապահված հայեցողությունը՝ կայացնելով առանձին հրապարակումներ կամ սոցցանցային գրառումներ հեռացնելու խիստ վիճելի որոշումներ։ Այս իրավիճակն անհարկի լարվածություն է ստեղծում՝ վտանգելով մեր երկրի առջև ծառացած լրջագույն մարտահրավերների արդյունավետ կառավարումը։

Իրավիճակը օպերատիվ ու ստեղծարար լուծում է պահանջում։ Ըստ այդմ, պարետին առաջարկում եմ ներառական սկզբունքով ձևավորել հանրության շրջանում վստահություն վայելող փորձագետներից կազմված հանձնախումբ, և որևէ լրատվական նյութ հեռացնելու մասին որոշում կայացնել հանձնախմբի եզրակացության հաշվառմամբ։

Պատրաստ եմ առաջարկիս մանրամասների քննարկմանը՝ ցանկացած առցանց ձևաչափով»: