ԱՄՆ-ում կորոնավիրուսից մահացել է 34-ամյա հայ քաղաքացի

ԱՄՆ Փասադենա նահանգի հոսպիտալներից մեկում նոր տեսակի կորոնավիրուսից մահացել է Լոս Անջելեսի Գլենդորա քաղաքի բնակիչ Ջոֆֆրի Ղազարյանը, ում մոտ վիրուսը հայտնաբերվել էր անցյալ շաբաթ. այս մասին Yerkir.am-ը տեղեկանում է «Ասպարէզ» օրաթերթից։

Ղազարյանը մահացել է հինգշաբթի առավոտյան. հիվանդանոցում նա 5 օր միացված էր թոքեր օդի մատակարարման սարքին, այն բանից հետո, երբ մարտի 13-ին նրա մոտ հայտնաբերվեց համաճարակը։

«Նա շատ էր տառապում, բայց իսկական կռիվ էր տալիս։ Մենք կկարոտենք մեր Ջեֆֆին ամեն օր», - իր ֆեյսբուքյան էջում գրում է Ջոֆֆրիի քույրը։

Ղազարյանի ընտանիքը TMZ լրատվական կայքին հայտնել էր, որ Ղազարյանը Լոս Անջելեսից մեկնել էր Օռլանդո՝ աշխատանքային կոնֆերանսի, սակայն որոշել էր այդ ընթացքում նաև ընկերների հետ այցելել այնտեղի «Դիսնեյի աշխարհ» և «Տիեզերական այգի»։

Ընտանիքը նշել է, որ մարտի 7-ին Ղազարյանի մոտ հազ սկսվեց, իսկ հաջորդ օրը հազից սկսեց արնահոսել։ Նա վերադարձավ Լոս Անջելես և անմիջապես ուղևորվեց հիվանդանոց՝ բարձր ջերմությամբ։ Հիվանդանոցում պարզվեց, որ Ղազարյանն ուներ թոքաբորբ և ստուգվեց կորոնավիրուսի առկայությունը։

Մարտի 13-ին թեստի պատասխանները դրական ցույց տվեցին և պարզվեց, որ նրա թոքերն արդեն 60-70 տոկոսով խցանված են թոքաբորբով։

Ընտանիքը նաև հայտնեց, որ Ղազարյանն ուներ ասթմա և բրոնխաբորբ և 2016 թ. քաղցկեղի վիրահատություն էր տարել։