Մեքքայի և Մեդինայի սրբավայրերում սանիտարական միջոցառումներ են իրականացվել կորոնավիրուսի դեմ

Մեքքայի Ալ Հարամ մզկիթում, որտեղ գտնվում է մուսուլմանների գլխավոր սրբությունը՝ Կաաբան, նաև Մեդինայի Մարգարեի մզկիթում (Ալ Մասջիդ ան Նաբավի) սանիտարական միջոցառումներ են իրականացվել Covid-19 կորոնավիրուսի դեմ. ըստ yerkir.am-ի՝ տեղեկացնում է սաուդյան Al-Ekhbariya հեռուստաալիքը:

Միջոցառումների իրականացման ժամանակ մզկիթները փակ են եղել, բոլոր այցելուներին հեռացրել են տարածքից: Ներկայումս ծառայությունը վերսկսվել է:

Կորոնավիրուսի տարածման և երկրում վարակվածների հայտնաբերման ֆոնին՝ Սաուդյան Արաբիայի իշխանությունները անորոշ ժամանակով տեղացիների համար հետաձգել են փոքր հաջը՝ ումրան, իսկ այլ երկրներից ժամանած ուխտագնացների համար սահմանափակումներ են սահմանվել: Ումրան, ի տարբերություն մեծ հաջի, կարելի է իրականացնել տարվա ցանկացած եղանակի:

Սաուդյան Արաբիայում առայժմ գրանցվել է կորոնավիրուսով վարակման 5 դեպք: Արգելված է այն երկրների քաղաքացիների մուտքը, որտեղ Covid-19-ով վարակման դեպքերը շատ են: