17 տարվա ազատազրկում կոռուպցիայի համար. Հարավային Կորեայի նախկին նախագահը դատապարտվել է

Սեուլի գերագույն դատարանը Կորեայի Հանրապետության նախկին նախագահ Լի Մյոն Բակին մեղավոր է ճանաչել միջոցների յուրացման և խոշոր չափերի կաշառք ստանալու գործով. հայտնում է Yerkir.am-ը՝ ՏԱՍՍ-ին հղումով: 

Երկրի նախկին նախագահի նկատմամբ պատժամիջոց է ընտրվել կալանավորումը` 17 տարի ժամկետով: Նա կալանավորվել է հենց դատարանի դահլիճում:

Միևնույն ժամանակ 78-ամյա Լի Մյոն Բակին պարտավորեցվել է շուրջ 15,7 միլիոն դոլարի չափով տուգանք վճարել: 

Նախկին նախագահին կասկածվում էր DAS ավտոմոբիլային մասերի արտադրող կազմակերպության միջոցները յուրացնելու և նախագահության ընթացքում Samsung Electronics ընկերությունից կաշառքներ ստանալու համար:

Հավելվում է նաև, որ Բակը նախկինում ևս պատիժներ է կրել կոռուպցիայի և կաշառակերության համար: Նա անգամ դատապարտվել էր 15 տարվա ազատազրկման, բայց 2019-ի մարտին գրավի դիմաց ազատ էր արձակվել առողջական վիճակի վատթարացման պատճառով: