ԱՄՆ-ը չի կատարել Սիրիայում հրադադարի վերաբերյալ իր խոստումները. Էրդողան

Թուրքիայի և ԱՄՆ-ի միջև օրեր առաջ ձեռք բերված՝ 120-ժամյա հրադադարի մասին պայմանավորվածության ժամկետը սպառվել է: Հրադադարը նախատեսված էր քրդերին Սիրիայի հյուսիսում «անվտանգության գոտուց» դուրս բերելու համար.  հայտնում է թուրքական NTV հեռուստաալիքը՝ վկայակոչելով Թուրքիայի նախագահ Ռեջեփ Թայիփ Էրդողանին, որը նաև կարծիք է հայտնել, թե ԱՄՆ-ն այս ընթացքում չի կատարել իր խոստումները:

«Խոստումները չեն կատարվել: Մեր՝ զիջումների գնալու պարագայում ճանապարհ կբացվի ահաբեկչական կազմակերպության համար»,- հայտարարել է նա:

Ըստ Թուրքիայի պաշտպանության նախարարության տվյալների՝ քրդական խմբավորումների դուրսբերման ընթացքում գրանցվել է 42 խախտում:

Հիշեցնենք, որ հոկտեմբերի 9-ին Թուրքիայի նախագահ Ռեջեփ Թայիփ Էրդողանը հայտարարել է, որ երկրի ԶՈւ-ն սկսել է «Խաղաղության ակունք» ռազմական գործողությունը Սիրիայում: