Նկատվում է անհանդուրժողական և սադրիչ հռետորաբանություն, հատկապես՝ առցանց տիրույթում. ԵԱՀԿ/ԺՀՄԻԳ-ի՝ ընտրությունների վերաբերյալ զեկույցը

Դիտորդական առաքելություն իրականացնող ԵԱՀԿ/ԺՀՄԻԳ-ը հրապարակել է դեկտեմբերի 9-ին կայանալիք խորհրդարանական ընտրությունների վերաբերյալ միջանկյալ զեկույցը, որում, օրինակ, նշվում է. «Քարոզարշավը պաշտոնապես մեկնարկել է նոյեմբերի 26-ին, սակայն վաղաժամ քարոզչությունը չի արգելվում: ԺՀՄԻԳ ԸԴԱ և կուսակցությունների ներկայացուցիչների հանդիպումների ընթացքում վերջիններս վստահություն հայտնեցին ազատ քարոզարշավի անցկացման հնարավորության վերաբերյալ: Այնուամենայնիվ, որոշ զրուցակիցներ մտահոգություններ հայտնեցին պետական ռեսուրսների հնարավոր չարաշահման, քվեների գնման, ինչպես նաև ընտրողների վրա ճնշում գործադրելու վերաբերյալ, հատկապես` գյուղական տարածքներում»:

Զեկույցում նաև ասվում է, որ «զրուցակիցների մեծ մասը մտահոգություններ են հայտնել անհանդուրժողական և սադրիչ հռետորաբանության վերաբերյալ, հատկապես` առցանց տիրույթում»:

Ինչ վերաբերում է լրատվամիջոցների աշխատանքին, ապա, ըստ զեկույցի, որոշ ԶԼՄ-եր շարունակում են դիտարկվել որպես քաղաքական ուժերի հետ փոխկապակցված: «Լրատվական միջավայրը բազմազան է, սակայն շատ ԶԼՄ-ներ ընկալվում են որպես փոխկապակցված քաղաքական ուժերի հետ, այդ թվում` Հանրային հեռուստաընկերությունը: Ի լրումն հեռարձակվող ԶԼՄ-ների, սոցիալական ցանցերը քաղաքական տեղեկատվության նշանակալի հարթակ են հանդիսանում: ԺՀՄԻԳ ԸԴԱ-ի որոշ զրուցակիցներ մատնանշեցին որոշակի բարելավումներ, սակայն հանրային դիսկուրսը որակեցին որպես ոչ նպաստավոր գործող կառավարության, մասնավորապես` վարչապետի հասցեին քննադատությունների համար»:

Զեկույցն ամբողջությամբ կարող եք տեսնել այստեղ: