Սպասվում են ուժեղ շոգեր. ջերմաստիճանն օրական մեկ աստիճանով կբարձրանա

Առաջիկա օրերի եղանակային կանխատեսումները լրագրողների հետ հանդիպման ժամանակ ներկայացրեց ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանը:

Նա նշեց, որ առաջիկա օրերին սպասվում են ուժեղ շոգեր, ինչը պայմանավորված է նրանով, որ Իրաքի տարածքում գտնվող ջերմային ցիկլոնը շարժվում է դեպի հյուսիս:

«Առավելագույն բարձր ջերմաստիճան կգրանցվի օգոստոսի 6-7-ին: Այդ օրերին Արարատյան դաշտավայրում, Երևանում, Մեղրիի, Ագարակի կողմերում ջերմաստիճանը կհասնի մինչև 41 աստիճանի: Մինչև օգոստոսի 7-ը գտնվելու ենք ջերմային ցիկլոնի ազդեցության գոտում: Ջերմաստիճանը կսկսի բարձրանալ վաղվանից և օրական մեկ աստիճան կբարձրանա»,- ասաց Սուրենյանը:

Ըստ նրա` այս օրերին լեռնային գոտիներում ջերմաստիճանը կլինի 36 աստիճան, ինչը տվյալ գոտների համար բարձր ջերմաստիճան է համարվում:

Սուրենյանը խորհուրդ է տալիս խուսափել արևի ուղիղ ճառագայթներից: «Խորհուրդ ենք տալիս ժամը 11:00-17:00-ն ընկած ժամանակահատվածում խուսափել արևի ուղիղ ճառագայթներից: Պետք է խուսափել նաև ցերեկվա ժամերին ֆիզիկական աշխատանք կատարելուց, քանի որ այն կարող է հանգեցնել արևահարության: Բացի այդ` պետք է շատ հեղուկ օգտագործել, իսկ ալկոհոլ` շատ քիչ»,- նշեց նա: