Դիվերսիոն ներթափանցման փորձ իրականացրած ադրբեջանցու դին դեռեւս հայկական կողմի մոտ է

Դեկտեմբերի 29-ին Տավուշի մարզի Չինարիի դիրքերի ուղղությամբ դիվերսիոն ներթափանցման փորձ իրականացրած ադրբեջանցի դիվերսանտներից մեկի դին դեռևս գտնվում է հայկական կողմի մոտ: Yerkir.am-ի հետ զրույցում ԿԽՄԿ հայաստանյան գրասենյակի մամուլի հարցերով պատասխանատու Զառա Ամատունին հայտնեց, որ զինծառայողի դին ադրբեջանական կողմին վերադարձնելու ուղղությամբ տարվող բանակցությունները դեռևս շարունակվում են: «Այդ հարցը մեր աշխատանքային օրակարգում է»,- նշեց նա:

Անդրադառնալով զինծառայողի դիակի պահման պայմաններին` Ամատունին ասաց. «Իրավաբանական հստակ ձևակերպումներ գոյություն չունեն` դին պահելու պայմանների հետ կապված, խնդիրն այստեղ վերաբերում է մարդասիրական կողմին»:

Հիշեցնենք, որ 2016թ. դեկտեմբերի 29-ին վաղ առավոտյան ադրբեջանական զինված ուժերի կողմից ՀՀ Տավուշի մարզի Չինարի գյուղի մոտակայքում ձեռնարկվել է զինված հարձակում, որի հետևանքով սպանվել են երեք հայ զինծառայողներ: ՀՀ պետական սահմանի պաշտպանության համար մղված մարտերի ընթացքում զոհվել են ավագ լեյտենանտ Շավարշ Մելիքսեթի Մելիքյանը, շարքայիններ Էդգար Գրիգորի Նարայանը և Էրիկ Գարիկի Աբովյանը: