Եթե խորհրդարանական ուժերը փոխհամաձայնության հասնեն, ԸՕ-ի վերաբերյալ արտահերթ նիստ կհրավիրվի

ԱԺ հերթական քառօրյայում երկրորդ ընթերցման ռեժիմով քննարկվում է Ընտրական նոր օրենսգրքի նախագիծը: Հիմնական զեկուցող` կառավարության աշխատակազմի ղեկավար-նախարար Դավիթ Հարությունյանը ներկայացրեց իրականացված բոլոր աշխատանքները, ներկայացված առաջարկները, թե որքանով են այդ առաջարկները տեղ գտել ԸՕ նախագծում:

Նախարարի խոսքով՝ եթե խորհրդարանական ուժերը փոխհամաձայնության հասնեն, կառավարությունը պատրաստ է Ընտրական օրենսգրքի վերաբերյալ արտահերթ նիստ առաջարկել Ազգային Ժողովին: Իսկ քննարկումները կարող են շարունակվել նաև Ընտրական օրենսգրքի 2-րդ եւ 3-րդ ընթերցմամբ ընդունվելուց հետո: Դավիթ Հարությունյանի հավաստմամբ՝ ցանկացած առաջարկ մանրամասնորեն կքննարկվի:

«ԸՕ-ն պետք է ընդունվի մինչև հունիսի 1-ը: Դա հաշվի առնելով` ակնկալում ենք, որ ԸՕ 3-րդ եւ վերջնական ընթերցմամբ այն ընդունվի այս քառօրյայում: Բայց եթե պարզվի, որ իշխանությունները եւ ընդդիմությունն իրենց առաջարկներով փոխզիջման են հասել, հնարավոր կլինի մինչեւ մայիսի վերջը արտահերթ նիստ կազմակերպել, որպեսզի չուշանանք հունիսի 1-ի համար», - ասաց նախարարը: