Նախարարը հորդորում է զերծ մնալ ամենասերտ շփումներից ու «պաչիկներից»

Այսօր լրագրողների հետ զրույցում առողջապահության նախարար Արմեն Մուրադյանը անդրադարձել է համաճարակ հասկացությանն առհասարակ, և ինչ գործողություններ է ենթադրում համաճարակի սահմանումը: Նախարարը նշեց, որ այդ հարցը շահարկումների տեղիք է տվել, սակայն  Հայաստանը շատ հեռու է եղել համաճարակից, անգամ համաճարակի բռնկումից  է եղել հեռու: Համաճարակը սահմանվում է կառավարության հատուկ որոշմամբ, որից հետո սկսվում են փուլային գործողություններ, հասարկական հանրային  նշանակություն ունեցող միջոցառումներն են հետաձգվում, համապատասխան  հանձնաժողովներ են ստեղծվում և այլն:

Նախարարը հորդորեց բոլորին զերծ մնալ մոտ,  ամենասերտ շփումներից, համբույրներից և վատ զգալու դեպքում վաղ դիմել բժշկին: Ի դեպ, նախարարը նշեց, որ դեմ չէ կանխարգելիչ այնպիսի մեթոդների, որոնք համարվում են ժողովրդական բժշկություն: Ըստ նախարարի,  ժողովրդական միջոցները, դարավոր քննություն են անցել ու հասել մեզ, և կարելի է դիմել նաև կանխարգելիչ նմանատիպ միջոցներին: Նախարարը հատուկ հավելեց, որ տեղեկություններն այն մասին, թե չարորակ ուռուցքներից մահացության ցուցանիշով Հայաստանը զբաղեցնում է աշխարհում առաջատար դիրքեր, բացարձակ սուտ է: