Մենք հետեւում ենք` Ադրբեջանին ինչ է մատակարարվում եւ որտեղից. Մովսես Հակոբյան

Այսօր ՊՆ-ում Yerkir.am- ի լրագրողը ՀՀ ԶՈՒ գլխավոր շտաբի պետի տեղակալ Մովսես Հակոբյանից հետաքրքրվեց, արդյոք չի մտահոգում ադրբեջանական կողմի  գործողություններում թուրքական գործոնի առկայությունը, մասնավորապես` հայկական զինուժի դեմ օգտագործվող թուրքական զինատեսակների կիրառումը եւ  դիվերսիաների ժամանակ Թուրքիայում վերապատրաստված հատուկ ջոկատայինների ներգրավումը:

«Առաջին անգամ թուրքական զենքի հետ առնչվել եմ 1994–ի ապրլին, երբ թուրքական կապի միջոցները, թուրքական ականանետները հակառակորդից առգրավեցինք: Թուրքիան երբեք չի ժխտել, որ սատարում է Ադրբեջանին: Թուրքիան  մեղքերի թողության փոխարեն  սրում է իրավիճակը: Թուրքական զենքերի կիրառումն առանձնահատուկ չէ: Նախորդ տարիներին էլ է հակառակորդը կիրառել այն: Մինչեւ այդ զենքի` Ադրբեջանի Հանրապետություն հասնելը մենք հետեւում ենք` Ադրբեջանին ինչ է մատակարարվում, որտեղից:  Նման զենքերի առկայության  մասին  մենք տեղյակ ենք»,- ասաց Մովսես Հակոբյանը:

Անդրադառանալով ռուսական  զենքի կիրառմանը` նա նշեց, որ  վերջին մի քանի տարում Ադրբեջանի կողմից գնված ռուսական զենքի վերջին խմբաքանակը չի օգտագործվում: