ՎՏԲ բանկի արձանի նկատմամբ «բռնություն գործադրելու» դեպքի առթիվ քրեական գործ է հարուցվել

Օրեր առաջ համացանցում հայտնվել էր մի տեսանյութ, որում երևում է, թե ինչպես են երկու երիտասարդներ «բռնություն գործադրում» «ՎՏԲ-Հայաստան» բանկի պղնձաձույլի արձանի նկատմամբ: Հայտնի դարձավ, որ դեպքը տեղի է ունեցել այս տարվա հունվարի 7-ին: Բացի արձանից, վնասվել է նաև բանկի շքամուտքի աստիճանի գրանիտե սալիկը:

ՀՀ քննչական կոմիտեիցyerkir.am-ը տեղեկացավ, որ դեպքի առթիվ հարուցվել է քրեական գործ` ՀՀ ՔՕ 185-րդ հոդվածի 2-րդ մասի 2-րդ կետի հատկանիշներով (ուրիշի գույքը դիտավորությամբ ոչնչացնելը կամ վնասելը, որը խոշոր չափերի վնաս է պատճառել):

Քննության ընթացքում ՎՏԲ բանկից ստացվել էր տարածքում առկա տեսանկարահանող սարքի տեսագրությունը և հանձնարարարություն է տրվել ոստիկանության համապատասխան ստորաբաժանումներին` միջոցներ ձեռնարկել տեսագրության մեջ ներկայացված առերևույթ հանցանք կատարած անձանց ինքնությունը պարզելու և նախաքննության մարմնին ներկայացնելու ուղղությամբ:

Նշենք, որ հիշյալ հանցանքը պատժվում է ազատազրկմամբ՝ երկուսից վեց տարի ժամկետով: