Արցախում մի շարք զինծառայողներ արժանացել են մեդալների

Այսօր Ստեփանակերտում տեղի է ունեցել ծառայողական խորհրդակցություն՝ նվիրված 2014թ. ձմեռային զորակոչի արդյունքների ամփոփմանը և ամառային զորակոչի խնդիրների քննարկմանը: Խորհրդակցությանը ներկա էին ԼՂՀ նախագահ Բակո Սահակյանը, կառավարության անդամներ, ուժային կառույցների և տեղական ինքնակառավարման մարմինների ղեկավարներ:

Հանրապետության գլխավոր զինկոմը վերլուծել է ընթացիկ տարվա ձմեռային զորակոչի արդյունքները, անդրադարձել արձանագրված ձեռքբերումներին ու թերացումներին: Այնուհետև ներկայացվել են ամառային զորակոչի նախապատրաստման ուղղությամբ իրականացված աշխատանքները:

Հրապարակվել է Արցախի նախագահի «Պարգևատրման մասին» հրամանագիրը, համաձայն որի՝ մայիսի 21-ի լույս 22-ի գիշերը սահմանային գծի հարավային հատվածում թշնամու ոտնձգությունները կասեցնելու և պետական սահմանը անառիկ պահելու համար մի շարք զինծառայողներ արժանացել են «Արիության համար» և «Մարտական ծառայության» մեդալներով:

Այնուհետև ներկայացվել է ԼՂՀ պաշտպանության նախարարի «2014թ. ձմեռային զորակոչի արդյունքների մասին» հրամանը: Դրանով նախորդ զորակոչի նախապատրաստման և կազմակերպման ընթացքում աչքի ընկած մի շարք զինծառայողներ ու քաղաքացիական գերատեսչությունների աշխատակիցներ արժանացել են շնորհակալության, պարգևատրվել պատվոգրերով և հուշանվերներով: Այս մասին հայտնում է ԼՂՀ ՊՆ մամուլի ծառայությունը: