«Շիրակ»-ը Գյումրիում հաղթեց «Փյունիկ»-ին

Ֆուտբոլի Հայաստանի բարձրագույն խմբի առաջնության 20-րդ տուրի վերջին հանդիպումը տեղի ունեցավ այսօր:

Գյումրիում «Շիրակ»-ը հյուրընկալեց «Փյունիկ»-ին: Երևանցիները 23-րդ րոպեին Սարգիս Բալոյանի խփած գոլի շնորհիվ առաջ անցան հաշվի մեջ, սակայն գյումրեցիները կարողացան կամային հաղթանակ տոնել: Նախ՝ առաջին խաղակեսի վերջնամասում Դամե Դիոպը հավասարեցրեց հաշիվը, իսկ 66-րդ րոպեին Անդրանիկ Բարիկյանը 2-րդ գնդակն ուղարկեց «Փյունիկ»-ի դարպասը: Ավելացված ժամանակի վերջին րոպեին Արամ Մանուկյանը ձևակերպեց խաղի վերջնական հաշիվը: «Շիրակ»-ը հաղթեց 3:1 հաշվով և շարունակում է առաջատար «Արարատ»-ից հետ մնալ 6, իսկ «Բանանց»-ից՝ 1 միավորով: «Փյունիկ»-ը 27 միավորով 4-րդն է:

Հիշեցնենք, որ 20-րդ տուրի 3 հանդիպում տեղի էր ունեցել երեկ, և բոլոր խաղերում գրանցվել էր ընդամենը մեկ գնդակ: «Արարատ»-ը հաղթել էր «Ալաշկերտ»-ին, «Բանանց»-ը՝ «Գանձասար»-ին, իսկ «Միկա»-ն՝ «Ուլիս»-ին:

Ապրիլի 9-ին կկայանան 19-րդ տուրի հետաձգված խաղերը: «Միկա»-ն սեփական հարկի տակ կընդունի «Բանանց»-ին, իսկ «Գանձասար»-ը Կապանում կմրցի «Ալաշկերտ»-ի հետ:

20-րդ տուրից հետո մրցաշարային աղյուսակի ամբողջական տեսքն՝ այստեղ: