6 տարվա ազատազրկում` խոշոր չափերով խարդախության համար

Այսօր Կենտրոն և Նորք-Մարաշ վարչական շրջանների ընդհանուր իրավասության դատարանը` դատավոր Գագիկ Պողոսյանի նախագահությամբ, 6 տարվա ազատազրկման դատապարտեց առանձնապես խոշոր չափերի խարդախության մեջ մեղադրվող` 29-ամյա Բախշի Սարգսյանին: Նրան մեղադրանք էր առաջադրված ՀՀ ՔՕ 178-րդ հոդվածի 3-րդ մասի 1-ին կետի հատկանիշներով:

Ըստ մեղադրանքի` նա խարդախությամբ ուրիշի գույքի` առանձնապես խոշոր չափերի հափշտակություն կատարելու դիտավորությամբ 2010թ. հոկտեմբերին, Երևան քաղաքում գործող «Քնարյան» ՍՊԸ-ի տնօրեն Եղիշե Քնարյանին խաբելով, գնելու պատրվակով վերցրել է ավտոմեքենաներ, որոնք էժան գնով վաճառել է տարբեր քաղաքացիների և դիմել փախուստի:

2011թ. նոյեմբերի 10-ից ոստիկանության Կենտրոնականի բաժնի կողմից հետախուզվող Սարգսյանին ոստիկանության քրեական հետախուզության գլխավոր վարչության օպերատիվ խումբը Մոսկվա-Երևան չվերթով ՀՀ էր տեղափոխել 2012թ. հունիսի 16-ին: Նա արգելանքի տակ էր գտնվում 2011թ. դեկտեմբերի 26-ից:

Նշենք, որ դատարանը որոշում ընդունեց նաև բռնագրավել Սարգսյանի` 10 մլն դրամի չափով գույքը: