Չոփը գերան մի՛ սարքեք

«Ի՞նչ է՝ եզդին իրավունք չունի՞ հայի հետ վիճաբանել։ Եզդիներն ու հայերը կողք կողքի խաղաղ ապրել են, ապրում են ու պիտի ապրեն»,- ասել է Աշխարհի եզդիների միության և Եզդիների ազգային միության նախագահ Ազիզ Թամոյանը` խոսելով օգոստոսի 17-ին Զովունիում հայ և եզդի հարևանների միջեւ տեղի ունեցած կռվի մասին:

Թամոյանի մեկնաբանմամբ` փոքրիկ կենցաղային վեճ է եղել, որին չի կարելի միջազգային բախման երանգ տալ։ Թամոյանը հավաստիացնում է, որ ինքն անձամբ է գնացել եւ հաշտեցրել նրանց, անգամ` ոստիկանությունում հայտարարել է, որ եթե հանկարծ  վեճը շարունակվի, ինքն է պատասխան տալու:

«Ի՞նչ ա, եղբայրը եղբոր հետ չի՞ վիճում, չի՞ կռվում։ Եզդիներն էլ են իրար հետ կռվում, եղբայրը եղբորն է սպանել՝ եզդի։ Ես 500 հոգի եզդի զորքով գնացել եմ կռիվ Արցախյան պատերազմ ու 30 զոհ եմ տվել մեր հողի, մեր հայրենիքի համար. Հայաստանը մեր հայրենիքն է»,- նշել է Թամոյանը: