Փոխոստիկանապետն անհողդողդ էր

ՀՀ ոստիկանության պետի տեղակալ Արթուր Օսիկյանն այսօր լրագրողներին ներկայացրեց ոստիկանության բնագավառում նախատեսված բարեփոխումների ստվար տեղեկանքը եւ ամենեւին հակված չէր պատասխանելու այն հարցերին, որոնք անմիջական առնչություն չունեին հիշյալ բարեփոխումների հետ:

Փոխոստիկանապետը նախ հրաժարվեց տեսակետ հայտնել Թամամյանի գործի վերաբերյալ եւ ասաց, որ տեղեկություն չունի, թե այժմ որտեղ է գտնվում քրեական հետախուզության գլխավոր վարչության նախկին պետը: «Եթե ունենայի` կպատասխանեի»,- ասաց նա:

Համարյա նման պատասխանը տվեց նաեւ այն հարցին, թե ճի՞շտ են տեղեկությունները, որ Արմավիրի ոստիկանապետը ծեծել է Արմավիրի քաղաքապետի թեկնածուներից մեկին. «Նման կարգի տեղեկությունները կփորձենք մեր հասարակայնության եւ տեղեկատվության վարչությունից ճշտել, բայց ես ձեզ խոստանում եմ, որ անպայման հարցը կներկայացվի եւ կստուգվի: Եթե կլինի նման դեպք, իհարկե, դրա հետ կապված կլինի համապատասխան քննություն: Այս պահին ես նման տեղեկատվության չեմ տիրապետում»:

Ա. Օսիկյանը խուսանավեց նաեւ այն հարցից, թե ինչո՞ւ Ազատության հրապարակում հացադուլ անող «Ժառանգության» ղեկավարին չի թույլատրում վրան տեղադրել, եւ ինչո՞ւ են կոտրել նրա անձրեւանոցը. «Ձեր նշած հարցերի հետ կապված` ոստիկանությունն ունի իր հստակ դիրքորոշումը, եւ եթե ձեզ իսկապես հուզում է խնդիրը եւ ցանկություն ունեք իմանալ ոստիկանության մոտեցումը, կարող եք նորից դիմել մեր լրատվության ծառայություն, եւ ոստիկանության պաշտոնական դիրքորոշումն այդ հարցի շուրջ կստանաք»:

Լրագրողներն, այնուամենայնիվ, փորձեցին պարզել փոխոստիկանապետի տեսակետը, սակայն նա անհողդողդ էր եւ պատասխանեց, որ ինքն անձնական տեսակետներ հայտնելու համար չի եկել: