Ֆիլիպը դաշնա՞կ

Երգիչներ Ֆիլիպ Կիրկորովի և Իրինա Ալեգրովայի այցելությունը Բաքու (մարտի 2-ին) ադրբեջանական հասարակության շրջանում թունդ բանավեճի առիթ է դարձել:

Այսպես կոչված` Ղարաբաղի ազատագրման կազմակերպությունը հայտարարություն է տարածել, որում վստահաբար նշել է, թե «այդ երգիչները ծառայում են հայկական քաղաքականությանը»:

«Ֆիլիպ Կիրկորովի հայրը` բուլղարական ծագմամբ Բեդրոս Կիրկորովը, երգիչ է Բուլղարիայում և ամեն տարի հիշատակի համերգներ է տալիս Հայոց ցեղասպանության օրը: Նա նաև Դաշնակցություն կուսակցության անդամ է: Ֆիլիպի հորեղբայրը` Կիրկ Կիրկորովը, բնակվում է ԱՄՆ-ում և նյութապես օգնում է Հայաստանին: Ֆիլիպն էլ համերգներից մեկի ընթացքում հայտարարել է, թե հպարտ է իր հայկական ծագմամբ»,- ասված է հայտարարության մեջ:

Կազմակերպությունը չի մոռացել նաև Ալեգրովային և նշել, թե հայկական ծագմամբ երգչուհին քարոզել է Հայաստանի զավթողական քաղաքականությունը: Նրա հայրը` Ալեքսանդր Սարգսյանը, ժամանակին ապրել է Բաքվում, ապա տեղափոխվել Հայաստան, որտեղից էլ՝ Ռուսաստան:

ՂԱԿ-ը հայտարարության մեջ անիծել է համերգի կազմակերպիչներին, Կիրկորովին, Ալեգրովային և բոլորին, ով կհամարձակվի մարտի 2-ին հայտնվել Բաքվում: