Լովչև. "Դա թիմ չէ, այլ ճահիճ"

ԽՍՀՄ հավաքականի նախկին պաշտպան Եվգենի Լովչևը հայտարարել է, որ ընկերական խաղից հետո, որում Ռուսաստանը պարտվեց Իրանի հավաքականին 0:1 հաշվով, ազգային հավաքականում հասունացել է արմատական փոփոխություն կատարելու անհրաժեշտությունը: Իբրև դրական գործոն` նա նշել է այն հանգամանքը, որ հավաքականի ֆուտբոլիստներն այս հանդիպումից հետո սկսել են վախենալ Եվրո-2012-ի ընտրական փուլի շրջանակում Երևանում կայանալիք Հայաստան-Ռուսաստան պաշտոնական հանդիպման ելքի համար:

«Ցավալի է, որ հավաքականը վերածվել է փակ ակումբի, որտեղ հրավիրվում են միայն իրար ծանոթ մարդիկ: Նրանք գիտեն, որ անկախ նրանից, թե ինչպես իրենց կդրսևորեն խաղադաշտում, միևնույն է, հրավեր կստանան, դա թիմ չէ, այլ ճահիճ»,- ասել է նա:

«Դիկը պետք է հասկանա, որ այս կազմը խաղերը դասակարգում է կարևորների և ոչ այնքան կարևորների, որ խաղի ընթացքում թիմը չի կարողանում վերափոխվել և փոխել իրավիճակը: Դա ապացուցված է դեռ Հիդինգի ժամանակ Հունգարիայի հետ ոչ-ոքիի ժամանակ, կամ պարտությունները Բելգիայից և Իրանից: Դա ապացուցված է Մարիբորի խայտառակ խաղով:

Անհրաժեշտ է փոխվել: Ի վերջո, Հիդինգն էլ միանգամից թիմ չսարքեց, և ժամանակն էլ քիչ էր: Եվրո-2008-ի ընտրական խաղերում նա հավաքականը վերափոխեց, և այն ժամանակ նույնպես ասում էին, որ խաղացողներ չկան, որ Լոսկովի, Տիտովի, Սմերտինի սերունդն ուժեղագույնն էր երկրում: Բայց Գուսը չհավատաց, և ամեն ինչ ստացվեց: Միանգամից չստացավ, չարչարվեց, բայց ստացվեց, ինչն էլ ի սրտե ցանկանում եմ Դիկին: Միակ գործոնը, որը հիմա աշխատում է, Երևանում կայանալիք հանդիպման ժամանակ պարտության վախն է: Չեմ կասկածում, որ խաղացողները նման մտքեր ունեն: Ամբողջ երկրով մեկ խայտառակվելու վախը  պայքարի միակ իրական միջոց է` սթափեցնելու մեր հավաքականին»,- Լովչևի խոսքերը մեջբերում է Советский спорт-ը: