Իրականում թմրամիջոցների հետ կապված հանցագործությունները շա՞տ են

Այս տարվա առաջին 9 ամիսներին կատարված ընդհանուր բնույթի 57 հանցագործություններից 13-ը թմրամիջոցների հետ կապված հանցագործություններ են: Ի դեպ, անցյալ տարի նույն ժամանակահատվածում 39 հանցագործություն է արձանագրվել:

ԼՂՀ Գլխավոր դատախազ Արշավիր Ղարամյանը, սակայն, մտահոգված է թմրամիջոցների հետ կապված հանցագործությունների առթիվ, և գտնում է, որ այդ կարգի հանցագործությունների թվի նվազումը բնավ չի արտահայտում իրական վիճակը, պարզապես նվազել են այդ ուղղությամբ բացահայտումները: Այս կարծիքն օրերս նա արտահայտել է դատախազության կոլեգիայի ժամանակ:

Ոստիկանության տվյալներով` այս տարվա առաջին 9 ամիսների ընթացքում նման կարգի հանցագործության հետ կապված քրեական պատասխանատվության է ենթարկվել 12 անձ, որոնց միջին տարիքը 35 տարեկանն է:

Իսկ կառավարության օրերս կայացած նիստում էլ հավանության է արժանացել հանրապետությունում թմրամոլության և թմրամիջոցների ապօրինի շրջանառության դեմ պայքարի 2011թ. տարեկան ծրագիրը:

Արցախը թմրամիջոց արտադրող երկիր չի համարվում, նշված է վերոնշյալ ծրագրում, և թմրամիջոցների ապօրինի շրջանառությունը համեմատաբար քիչ է տարածված, իսկ հիմնական թմրամիջոցը հանդիսանում է կանեփի բույսի հումքի վրա պատրաստվող «մարիխուանա» տեսակի թմրամիջոցը: