Երեւան (Երկիր) - Բուլղարիայի Հանրապետության նախագահ Գեորգի Պրվանովի հրավերով` դեկտեմբերի 10-ին Հայաստանի Հանրապետության նախագահ Սերժ Սարգսյանը երկօրյա պաշտոնական այցով կմեկնի Սոֆիա, տեղեկացնում են ՀՀ նախագահի մամուլի գրասենյակից:
Նույն օրը կկայանա նախագահ Սարգսյանի առանձնազրույցը Բուլղարիայի իր պաշտոնակցի՝ Գեորգի Պրվանովի հետ: Հանդիպմանը կհետեւեն հայ-բուլղարական բանակցությունները` ընդլայնված կազմով: Այնուհետեւ տեղի կունենա փաստաթղթերի ստորագրման արարողությունը եւ երկու երկրների ղեկավարների մամուլի ասուլիսը:
Նախագահները կընդունեն այցի արդյունքների մասին համատեղ հայտարարություն: Նախատեսվում է ստորագրել նաեւ 2009 թվականին Հայաստանում բուլղարական մշակույթի օրերի եւ 2010 թվականին Բուլղարիայում հայկական մշակույթի օրերի կազմակերպման ու անցկացման մասին մտադրությունների արձանագրություն, պետական կառավարման ոլորտում համագործակցության 2009-2014 թթ. աշխատանքային ծրագիր, արխիվային գործի բնագավառում համագործակցության համաձայնագիր, ինչպես նաեւ երկու երկրների միջեւ եկամուտների ու գույքի կրկնակի հարկումը բացառելու մասին համաձայնագրում փոփոխություններ կատարելու մասին արձանագրություն:
Երկու երկրների նախագահների մասնակցությամբ տեղի կունենա նաեւ հայ-բուլղարական բիզնես ֆորումի բացումը:
Երկօրյա պաշտոնական այցի ընթացքում Հայաստանի ղեկավարը աշխատանքային ճաշ կունենա Բուլղարիայի վարչապետ Սերգեյ Ստանիշեւի հետ, կհանդիպի Ժողովրդական Ժողովի նախագահ Գեորգի Պիրինսկու հետ, ծաղկեպսակ կդնի Անհայտ զինվորի հուշարձանին։
Արտասահմանյան արվեստի ազգային պատկերասրահում Սերժ Սարգսյանը եւ Գեորգի Պրվանովը ներկա կգտնվեն Սերգեյ Փարաջանովի կոլաժների ցուցահանդեսի բացմանը:
Հայաստանի նախագահը կայցելի նաեւ Սոֆիայում ՀՀ դեսպանություն:
Վաղը Հայաստան կայցելի ԱՄՆ պետքարտուղար Հիլարի Քլինթոնը: ԱՄՆ այդչափ բարձրաստիճան պաշտոնյայի այցը Հայաստան, իհարկե, նշանակալից երեւույթ է. պաշտոնական Երեւանը նման այցերից երես չի առել: Կառավարող շրջանակներին մերձ փորձագետները այցը գնահատում են իբրեւ Հայաստանի նախաձեռնողական արտաքին քաղաքականության հերթական վկայություն, մատնանշում, որ այցի շրջանակներում Քլինթոնը Երեւանում կգտնվի հուլիսի 4-ին` ԱՄՆ ազգային տոնի օրը:...
